Годинашна тема на колонијата е „Одржливост“, а свој одговор на неа ќе се обидат да дадат Марта Стисјак од Полска, Правдолуб Иванов, Валентин Стефаноф и Нина Ковачева од Бугарија, Ласе Лоренцен од Данска, Зоран Тодоровиќ од Србија и Игор Сековски, Славица Јанешлиева и Гоце Наневски од Македонија
Деветмина реномирани ликовни уметници од земјава и од странство ќе создаваат уметност инспирирани од мијачкиот крај на 33. издание на Ликовната колонија „Галичник“ која од денеска до 28 август ќе се одржи во истоименото живописно село на планината Бистра. Годинашна тема на колонијата е „Одржливост“, а свој одговор на неа ќе се обидат да дадат Марта Стисјак од Полска, Правдолуб Иванов, Валентин Стефаноф и Нина Ковачева од Бугарија, Ласе Лоренцен од Данска, Зоран Тодоровиќ од Србија и Игор Сековски, Славица Јанешлиева и Гоце Наневски од Македонија.
Ана Франговска, куратор и уметнички директор на колонијата вели уметничкиот собир ја потврдува својата тенденција на имплементацијата на предностите на новата ера во античкиот амбиент на прекрасниот Галичник, како додавање на ново ткиво во организам со дефинирана стратиграфија.
– Хабитусот помеѓу старото и новото се издигнува во синтеза, синергија, надградба, современост со нагласен културен предзнак. Постојаните мешања и меѓу националниот белег, македонската гордост: културата на нашата земја и меѓународниот дух и културата на другите, различните; односот меѓу историјата, природата, фолклорот и традицијата со современата и урбана анемија на постмодерната уметност, ја формираат и дефинираат Ликовната колонија „Галичник“ како специфика не само на национален, туку и на регионален план – вели Франговска.
Според неа, квалитативниот императив е структурен елемент во систематската формална поставеност на оваа важна манифестација, а таа е потврдена со високото позиционирање на колонијата. Несебичната посветеност и ентузијазам во име на продолжување на долгогодишната културна традиција на селото Галичник и реканскиот крај и во име на квалитетната нововременска уметност воопшто и секако аспектот на размена на искуства и знаења и човечки ресурси се главните постулати на колонијата.
Од поранешните индзанија на колонијата
– Зошто е ова важно за глобалниот процес на (еколошката) менталната трансформација кон поодржливи општества? Специфичните уметнички практики, како што е еколошката уметност, и секојдневните практики, како што е пешачењето, ја илустрираат релевантноста на естетиката на одржливоста. Поимот „неодржливост“ ги карактеризира повеќедимензионалните аспекти на современата глобална цивилизациска криза. Повеќето автори кои пишуваат за оваа криза ги истакнуваат нејзините еколошки, социјални и економски параметри. Помалку автори разговараат за неговите културни димензии – вели Франговска.
Таа додава дека одржливоста, сфатена како процес на пребарување, треба да се однесува на сите димензии на неодржливоста, вклучувајќи ја и нејзината културна димензија. Зборот има неколку контрадикторни дефиниции, особено во зависност од тоа дали некој сака да ги нагласи „границите на (економскиот и индустрискиот) раст“ или верува во чудесната моќ на технологијата бесконечно да ги „заменува“ необновливите природни ресурси. Од културна перспектива, одржливоста може да се сфати како потрага по алтернативни групи на вредности и знаења за светот, реформирање на modi cognoscendi и формирање на разбирање на обрасците што ги поврзуваат економските, социјалните, политичките, културните и еколошките димензии на реалноста. Според тоа, културната димензија има основна вредност за целиот процес на пребарување на одржливоста.
Ана Франговска
– Разговарање, размислување и дејствување, регионално и пошироко, по ова прашање во рамките на прекрасното село Галичник е целта на учесниците на годинашната ликовна колонија. Одново станува збор за одлична селекција на уметници, сите со веќе завидни биографии и огромно искуство во современата уметност во светот, претставници на своите земји на престижното Венециско биенале и секако уметници со исклучително меѓународно излагачко реноме – вели Франговска.
(В.И.И.)
